1Cor 1 | AAK | STEP | Poronɨ —Nionɨ Gorɨxo xegí̵ nɨwimónɨrɨŋí̵pimɨ dánɨ gí̵ íwí̵ Jisasɨ Kiraisoyá wáí̵ wurɨmeiarɨŋí̵ wo imóní̵wɨnɨgɨnɨrɨ we'yo í̵á numɨrɨŋonɨrɨnɨ. Nionɨ negí̵ nɨrɨxí̵meáo, Soteniso tí̵nɨ nawínɨ nɨŋwearí̵ná

1 Corinthians 1

1 Poronɨ —Nionɨ Gorɨxo xegí̵ nɨwimónɨrɨŋí̵pimɨ dánɨ gí̵ íwí̵ Jisasɨ Kiraisoyá wáí̵ wurɨmeiarɨŋí̵ wo imóní̵wɨnɨgɨnɨrɨ we'yo í̵á numɨrɨŋonɨrɨnɨ. Nionɨ negí̵ nɨrɨxí̵meáo, Soteniso tí̵nɨ nawínɨ nɨŋwearí̵ná 2 sɨyikí̵ Jisasoyá imónɨgí̵á aŋí̵ Korinɨyo ŋweagí̵áyí̵ne' nánɨ —Seyí̵ne' Kiraisɨ Jisaso tí̵nɨ nawínɨ ikárɨnɨgí̵áyí̵ne' eŋagɨ nánɨ sɨyikwí̵ míní̵ imóní̵í̵rɨxɨnɨrɨ searí̵peaŋí̵yí̵ne'rɨnɨ. Seyí̵ne' ámá aŋí̵ nɨmɨnɨ gɨmɨ gɨmɨ ŋweagí̵á negí̵ Ámɨná Jisasɨ Kiraisomɨ —O Ámɨná ayí̵ tí̵nɨ nene tí̵nɨ nánɨ nawínɨ imónɨŋorɨnɨ. Omɨ yayí̵ wiarɨgí̵áyí̵ ní̵nɨ tí̵nɨ nawínɨ xewanɨŋoyá imóní̵í̵rɨxɨnɨrɨ we'yo í̵á seaumɨrɨŋí̵yí̵ne'rɨnɨ. Seyí̵ne' nánɨ payí̵ rɨna nearɨ mónaparɨŋɨnɨ. 3 “Negí̵ ápo Gorɨxo tí̵nɨ Ámɨná Jisasɨ Kiraiso tí̵nɨ awau' wá seawianɨri seyí̵ne' nɨwayɨrónɨro ŋweapí̵rɨ nánɨ seaiiri e'isixɨnɨ.” nimónarɨnɨ.

“Gorɨxo seaiapɨŋí̵pɨ nánɨ yayí̵ wiarɨŋárɨnɨ.” urɨŋí̵ nánɨrɨnɨ.

4 Seyí̵ne' Kiraisɨ Jisaso tí̵nɨ ikárɨnɨgí̵áyí̵ne' eŋagɨ nánɨ Gorɨxomɨ nurɨrí̵ná xí̵o wá nɨseawianɨrí̵ná naŋí̵ seaimɨxɨŋí̵pɨ nánɨ dɨŋí̵ nɨmorɨ íníná seyí̵ne' nánɨ yayí̵ wiarɨŋárɨnɨ. 5 Ayí̵ rɨpɨ nánɨ rarɨŋɨnɨ. Kiraiso tí̵nɨ ikárɨnɨgí̵áyí̵ne' Gorɨxo wá nɨseawianɨrɨ naŋí̵ imónɨŋí̵ bɨ bɨ nɨseaimɨxɨrí̵ná re'wapí̵nɨpaxí̵ imónɨro nɨjí̵á imónɨpaxí̵ imónɨro epí̵rí̵a nánɨ bɨ onɨmiápɨ sɨxí̵ mɨseamímó nɨpɨnɨ ayá wí seamímoŋí̵rɨnɨ. 6 Xwɨyí̵á Kiraiso nánɨ yaŋí̵ seaiapɨŋwápɨ xwioxí̵yo sí̵kí̵kí̵nɨŋí̵ seaomɨxɨnɨŋagɨ nánɨ 7 negí̵ Ámɨná Jisasɨ Kiraiso ámɨ xwí̵á tí̵yo nánɨ nɨweapɨrɨ piaumɨmí̵ iní̵wɨnɨgɨnɨrɨ xwayí̵ nanɨrɨ nɨŋwearóná e e epaxí̵ imóní̵í̵rɨxɨnɨrɨ xegí̵ kwíyí̵pimɨ dánɨ sɨxí̵ seamímoŋí̵pɨ nánɨ dí̵wí̵ wí mikeamónɨŋoɨ. 8 Jisasɨ Kiraiso sí̵á xí̵o ámá nɨyonɨ mí ómómɨxɨmí̵ ení̵áyi nánɨ sí̵kí̵kí̵ nɨseaomɨxa nuní̵á eŋagɨ nánɨ xwɨyí̵á mɨseaxekwí̵mopaxí̵yí̵ne' imónɨpí̵rí̵árɨnɨ. 9 Gorɨxo —O seyí̵ne' xegí̵ xewaxo, negí̵ Ámɨná Jisasɨ Kiraiso tí̵nɨ nawínɨ gwiaumí̵ inɨgí̵áyí̵ne' oimóní̵poyɨnɨrɨ we'yo í̵á seaumɨrɨŋorɨnɨ. O ananɨ ámá ikwiárɨnɨpaxí̵ imónɨŋo eŋagɨ nánɨ “O xɨxenɨ e neaiiní̵árí̵anɨ?” yaiwipaxí̵rɨnɨ.

“Jisasoyá sɨyikí̵ imónɨgí̵áyí̵ne' yaŋí̵ mepayónɨpanɨ.” urɨŋí̵ nánɨrɨnɨ.

10 Gí̵ nɨrɨxí̵meáyí̵ne', gí̵ dɨŋí̵ tí̵nɨ marí̵áɨ, negí̵ Ámɨná Jisasɨ Kiraiso e wíwapɨyíwɨnɨgɨnɨrɨ nɨrí̵peaŋí̵pimɨ dánɨ eŋí̵ rɨre'mɨxí̵ bɨ oseaimɨnɨ. Seyí̵ne' nɨyí̵ne'nɨ xwɨyí̵á axí̵pɨ rɨro píránɨŋí̵ nɨxɨrɨnɨro ŋweapí̵rɨ nánɨ xɨxegí̵nɨ yaŋí̵ mepayónɨpa ero dɨŋí̵ axí̵pɨ moro dɨŋí̵ aga ná bɨnɨ í̵á xɨrɨro nero ŋweáí̵rɨxɨnɨ. 11 Gí̵ nɨrɨxí̵meáyí̵ne', ámá Kɨrowioyá wí nɨbɨro seyí̵ne' nánɨ nɨnɨrɨróná “Ayí̵ mɨxí̵ rɨrowiágí̵ inarɨŋoɨ.” nɨrí̵á eŋagɨ nánɨ seararɨŋɨnɨ. 12 Wiyí̵ne' wiyí̵ne' rɨpɨ rɨpɨ rarɨgí̵á eŋagɨ nánɨ seararɨŋɨnɨ. Wiyí̵ne' “Poro neaiepɨsiarɨŋenerɨnɨ.” rarí̵ná wiyí̵ne' “Aporoso neaiepɨsiarɨŋenerɨnɨ.” rarí̵ná wiyí̵ne' “Pitao neaiepɨsiarɨŋenerɨnɨ.” rarí̵ná wiyí̵ne' “Kiraiso neaiepɨsiarɨŋenerɨnɨ.” rarɨgí̵á eŋagɨ nánɨ eŋí̵ rɨre'mɨxí̵ seaiarɨŋɨnɨ. 13 “Kiraiso ná wonɨ imónɨŋagɨ aí sɨyikí̵ oyá imónɨgí̵áyí̵ xɨxegí̵nɨ yaŋí̵ epayónɨpaxí̵rɨnɨ.” rɨseaimónarɨnɨ? “Poro nene arɨrá neainí̵a nánɨ íkí̵áyo yekwɨroárɨgí̵árɨnɨ.” rɨyaiwiarɨŋoɨ? Seyí̵ne' wayí̵ nɨseameairí̵ná Poromɨ oxí̵dí̵poyɨnɨrɨ yoí̵ nionɨyá nɨrɨro wayí̵ seameaigí̵áranɨ? 14 Nionɨ segí̵yí̵ wíyo wayí̵ mumeaipa nerɨ aí Kɨrisɨpasomɨ tí̵nɨ Gaiasomɨ tí̵nɨ awau'mɨnɨ wayí̵ numeairɨ nánɨ Gorɨxomɨ yayí̵ wiarɨŋɨnɨ. Ayɨnánɨ ámá wí re rɨpaxí̵ menɨnɨ, “Poroyá yoí̵ nɨrɨrí̵ná wayí̵ neameaigí̵enerɨnɨ.” rɨpaxí̵ menɨnɨ. 16 Ayí̵ neparɨnɨ. Ámá Sɨtepanasoyáyo enɨ wayí̵ umeaiŋápɨ nánɨ rɨxa dɨŋí̵ niní̵agɨ aiwɨ ámɨ wíyo enɨ wayí̵ umeaiŋárí̵anɨ? Nionɨ rɨxa dɨŋí̵ mɨninarɨnɨnɨ. 17 Ayí̵ rɨpɨ nánɨ rarɨŋɨnɨ. Kiraiso ámáyo wayí̵ umeaíwɨnɨgɨnɨrɨ nɨrowáre'napɨŋí̵manɨ. Xwɨyí̵á yayí̵ neainarɨŋí̵ xí̵o nánɨpɨ wáí̵ nurɨmeíwɨnɨgɨnɨrɨ nɨrowáre'napɨŋí̵rɨnɨ. Kiraiso yoxáí̵pámɨ nɨperí̵ná neaiiŋí̵pɨ surí̵má enɨgɨnɨrɨ wáí̵ nurɨmeíwɨnɨgɨnɨrɨ nɨnɨrowáre'napɨrí̵ná ámá wigí̵ dɨŋí̵yo dánɨ e'mí̵ saímí̵ nɨmoro ure'wapɨyarɨgí̵ápɨ ure'wapɨyíwɨnɨgɨnɨrɨ nɨrowáre'napɨŋí̵manɨ.

“Eŋí̵ eánɨrɨ nɨjí̵á seáyɨ e imónɨrɨ Gorɨxo eŋí̵pɨ Kiraiso sɨwá neaiŋí̵rɨnɨ.” urɨŋí̵ nánɨrɨnɨ.

18 Xwɨyí̵á Jisaso yoxáí̵pámɨ nene nánɨ neapeiŋí̵pɨ nánɨ ámá naní̵nanɨro yarɨgí̵áyí̵ re rarɨŋagí̵a aí, “Xwɨyí̵á apɨ mají̵á nikárɨnɨro rarɨgí̵ápɨrɨnɨ.” rarɨŋagí̵a aí nene Gorɨxo yeáyí̵ neayimɨxemeaarɨŋene re yaiwiŋwɨnɨ, “Jisaso íkí̵á yoxáí̵pámɨ peŋí̵pimɨ dánɨ Gorɨxo eŋí̵ eánɨŋí̵ xegí̵ imónɨŋí̵pɨ sɨwá neaiŋí̵rí̵anɨ?” yaiwiŋwɨnɨ. 19 Nionɨ rarɨŋápimɨ Bɨkwí̵yo re nɨrɨnɨrɨ eánɨŋí̵pɨ sopɨŋí̵ nɨwarɨnɨ, “Gorɨxonɨ ámá ‘Dɨŋí̵ e'mí̵ saímí̵ moarɨŋwae'nerɨnɨ.’ yaiwinarɨgí̵áyo mɨrɨrakí̵ wimí̵árɨnɨ. ‘Dɨŋí̵ imegí̵ yegí̵ moŋwae'nerɨnɨ.’ yaiwinarɨgí̵áyo dɨŋí̵ mɨxɨxeyaíkí̵ wimí̵árɨnɨ.” E nɨrɨnɨrɨ eánɨŋí̵pɨ nionɨ rarɨŋápimɨ sopɨŋí̵ nɨwarɨnɨ. 20 Ayɨnánɨ Gorɨxo e winí̵á eŋagɨ nánɨ ámá ríná dáŋí̵ imónɨgí̵á “Dɨŋí̵ e'mí̵ saímí̵ moarɨŋwae'nerɨnɨ.” yaiwinarɨgí̵áyí̵ arɨrerɨnɨ? Ŋwí̵ ikaxí̵ eánɨŋí̵pɨ mewegí̵áyí̵ enɨ arɨrerɨnɨ? “Xwɨyí̵á xɨmɨxɨmí̵ ninɨrɨ mɨrarɨŋwae'nerí̵anɨ?” yaiwinarɨgí̵áyí̵ enɨ arɨrerɨnɨ? Ámá Gorɨxomɨ dɨŋí̵ mɨwɨkwí̵roarɨgí̵áyí̵ “Dɨŋí̵ e'mí̵ saímí̵ nɨmorane rarɨŋwae'nerɨnɨ.” rarɨgí̵ápɨ nánɨ o rɨxa re oyaiwípoyɨnɨrɨ mɨneaíwapɨyipa eŋí̵ranɨ, “Nepa dɨŋí̵ e'mí̵ saímí̵ nɨmoro rarɨgí̵ápɨmanɨ. Mají̵á nikárɨnɨro rarɨgí̵ápɨrɨnɨ.” oyaiwípoyɨnɨrɨ mɨneaíwapɨyipa eŋí̵ranɨ? 21 Ayí̵ rɨpɨ nánɨ rarɨŋɨnɨ. Gorɨxo xewanɨŋo dɨŋí̵ e'mí̵ saímí̵ nɨmorí̵ná ámá xí̵omɨ dɨŋí̵ mɨwɨkwí̵ró “Dɨŋí̵ e'mí̵ saímí̵ nene negí̵ moarɨŋwápimɨ nɨxí̵dɨrane'ná ananɨ xí̵oyá ámae'ne imónɨpaxí̵rɨnɨ.” yaiwiarɨgí̵áyí̵ apɨ xe oimóní̵poyɨnɨrɨ sɨŋwí̵ mɨwɨní̵ xwɨyí̵á none wáí̵ rarɨŋwápimɨ —Apɨ “Mají̵á ikárɨnɨŋí̵pɨrɨnɨ.” rarɨgí̵ápɨrɨnɨ. Apimɨ dánɨnɨ ámá nepa dɨŋí̵ wɨkwí̵roarɨgí̵áyo Gorɨxo “Yeáyí̵ uyimɨxemeáɨmɨgɨnɨ.” wimónɨŋí̵rɨnɨ. 22 Gí̵ Judayí̵ xwɨyí̵á apɨ neparí̵anɨrɨ ipɨmónanɨ nánɨ emɨmí̵ bɨ oneaíwapɨyípoyɨnɨrɨ wimónarɨŋí̵rɨnɨ. E'máyí̵ xwɨyí̵á apɨ neparí̵anɨrɨ ipɨmónanɨ nánɨ nɨjí̵á seáyɨ e imónɨŋí̵ bɨ oneare'wapɨyípoyɨnɨrɨ wimónarɨŋí̵rɨnɨ. 23 E e wimóní̵agɨ aiwɨ none wáí̵ nurɨmerane'ná xwɨyí̵á rɨpɨ wáí̵ urarɨŋwárɨnɨ, “Ámá Gorɨxo yeáyí̵ uyimɨxemeáwɨnɨgɨnɨrɨ nánɨ urowáre'napɨŋomɨ yoxáí̵pámɨ yekwɨroárɨgí̵awixɨnɨ.” urarɨŋwárɨnɨ. E urarí̵ná e'máyí̵ “Xwɨyí̵á mají̵á inɨŋí̵pɨ rí̵a rarɨŋoɨ?” yaiwiarɨgí̵árɨnɨ. Gí̵ Judayí̵ “Sí̵mirɨrí̵ neaiarɨŋí̵pɨ rí̵a rarɨŋoɨ?” yaiwiarɨgí̵árɨnɨ. 24 E nerɨ aí xí̵oyá imónaní̵wá nánɨ we'yo í̵á neaumɨrɨŋene Judayeneranɨ, Gɨrikɨyeneranɨ, xwɨyí̵á apɨ arí̵á nɨwirane'ná re yaiwiarɨŋwárɨnɨ, “Kiraiso nɨperɨ nɨwiápí̵nɨmearɨŋí̵pimɨ dánɨ Gorɨxoyá eŋí̵ sɨxí̵ eánɨŋí̵ tí̵nɨ dɨŋí̵ e'mí̵ saímí̵ o moŋí̵pɨ tí̵nɨ sɨwá neaiŋí̵rí̵anɨ?” yaiwiarɨŋwárɨnɨ. 25 Ayí̵ rɨpɨ nánɨrɨnɨ. Ámá dɨŋí̵ re yaiwiarɨgí̵ápɨ, “Gorɨxo mají̵á nikárɨnɨrɨ yarɨnɨ.” yaiwiarɨgí̵ápɨ, apɨ aí pí pí nɨjí̵á ámá imónɨgí̵áyo wiárí̵ nɨmu'rorɨ seáyɨ e wimónɨnɨ. “Gorɨxo eŋí̵ samɨŋí̵ nɨwerɨ yarɨnɨ.” yaiwiarɨgí̵ápɨ, apɨ enɨ aí pí pí eŋí̵ eánɨŋí̵ ámá imónɨgí̵áyo wiárí̵ nɨmu'rorɨ seáyɨ e wimónɨnɨ.

26 Gí̵ nɨrɨxí̵meáyí̵ne', Gorɨxo gí̵ ámá oimóní̵poyɨnɨrɨ we'yo í̵á seaumɨráná íná seyí̵ne' imónɨgí̵ápɨ nánɨ dɨŋí̵ nɨmoróná “Poro ayí̵ apɨ nánɨ rí̵a neararɨnɨ?” yaiwipaxí̵rɨnɨ. Nionɨyáyí̵ oimóní̵poyɨnɨrɨ we'yo í̵á nɨseaumɨrɨrí̵ná segí̵yí̵ obaxí̵ wí nɨjí̵á ámá wigí̵ dɨŋí̵yo dánɨ imónarɨgí̵ápɨ xwe' bɨ imónɨŋáná we'yo í̵á seaumɨrɨŋí̵ranɨ? Segí̵yí̵ obaxí̵ wí xwe'rɨxayí̵ne' imónɨŋáná we'yo í̵á seaumɨrɨŋí̵ranɨ? Segí̵yí̵ obaxí̵ wí eŋí̵ rɨŋí̵ nimónɨro ámáyo umeŋweaŋáná we'yo í̵á seaumɨrɨŋí̵ranɨ? Oweoɨ. 27 O ámáyo yeáyí̵ uyimɨxemeámí̵ánɨrɨ nánɨ nerí̵ná ámá “Negí̵ dɨŋí̵yo dánɨ dɨŋí̵ e'mí̵ saímí̵ moŋwae'nerɨnɨ.” yaiwinarɨgí̵áyo ayá wimómí̵ánɨrɨ nánɨ “ ‘Mají̵á ikárɨnɨŋí̵ imónɨŋí̵pɨrɨnɨ.’ rarɨgí̵ápimɨ oxí̵dɨmɨnɨ.” nɨyaiwirɨ eŋí̵rɨnɨ. Ámá “Eŋí̵ sɨxí̵ eánɨŋwae'nerɨnɨ.” yaiwinarɨgí̵áyo ayá wimómí̵ánɨrɨ nánɨ “ ‘Eŋí̵ meánɨŋí̵pɨrɨnɨ.’ rarɨgí̵ápimɨ oxí̵dɨmɨnɨ.” nɨyaiwirɨ eŋí̵rɨnɨ. 28 Ámá xí̵omɨ mɨxí̵darɨgí̵áyí̵ “Apɨ seáyɨ e imónɨŋí̵pɨrí̵anɨ?” yaiwiarɨgí̵ápɨ anɨpá imɨxɨmí̵ánɨrɨ nánɨ “Amɨpí ayí̵ peayí̵ nɨwianɨro ‘Sɨpírɨnɨ.’ rarɨgí̵ápimɨranɨ, ‘Mipɨmónɨŋí̵rɨnɨ.’ rarɨgí̵ápimɨranɨ, sa apimɨ oxí̵dɨmɨnɨ.” nɨyaiwirɨ eŋí̵rɨnɨ. 29 Ámá wo aí Gorɨxoyá sɨŋwí̵ tí̵ŋí̵ e dánɨ mɨxí̵ meakí̵nɨnɨpaxí̵ mimónɨpa e'wɨnɨgɨnɨrɨ apɨ apɨ nɨyaiwirɨ eŋí̵rɨnɨ. 30 E nerɨ aí xewanɨŋo neaiiŋí̵pimɨ dánɨ Kiraisɨ Jisaso tí̵nɨ nawínɨ ikárɨnɨŋwae'nerɨnɨ. Omɨ dánɨ Gorɨxo dɨŋí̵ e'mí̵ saímí̵ xí̵o moarɨŋí̵pɨ dɨŋí̵ sɨxí̵ neamímorɨ xí̵oyá sɨŋwí̵yo dánɨ ámá we' rónɨŋwae'ne neaimɨxɨrɨ ámá nionɨyá sɨyikwí̵ mínɨŋí̵ imóní̵í̵rɨxɨnɨrɨ wimónɨŋí̵pɨ neaimɨxɨrɨ negí̵ í̵wí̵ yarɨŋwápimɨ dánɨ gwí̵nɨŋí̵ nearoayírorɨ eŋí̵rɨnɨ. 31 Gorɨxo Kiraisomɨ dánɨ apɨ apɨ neaiiŋí̵ eŋagɨ nánɨ Bɨkwí̵yo re nɨrɨnɨrɨ eánɨŋí̵pɨ, “Ámá mɨxí̵ nɨmeakí̵nɨróná ámá wí nánɨ mɨxí̵ mɨmeakí̵ní̵ Ámɨnáo nánɨ mɨxí̵ meakí̵ní̵poyɨ.” nɨrɨnɨrɨ eánɨŋí̵pɨ xɨxenɨ xí̵dí̵í̵rɨxɨnɨ.